Psalms 63

Bolamu na yo eleki bomoi

Nzembo ya David ayembaki yango tango azalaki na esobe ya Yudea.

1 Nzambe, yo ozali Nzambe na ngai,
na solo solo nazali koluka yo ;
molimo na ngai ezali na posa na yo ;
nzoto na ngai ezali na posa monene mpo na yo,
na kati ya mabele ekawuka, mpe ebeba
oyo ezanga mayi.

2 Namonaki yo na Esika ya bosantu,
mpe namonaki nguya na yo mpe nkembo na yo.

3 Pamba te, bolingo na yo eleki bomoi ;
bambebo na ngai ekokumisa yo.

4 Nakosanzola yo na tango nyonso nakozala na bomoi ;
mpe na kombo na yo nakotombola maboko na ngai

5 Molimo na ngai ekotonda lokola mafuta oyo ya kati
na bozui mingi ya biloko ya koliya.
Na banzembo, bambebo ya monoko na ngai ekosanzola yo.

6 Na mbeto na ngai, nakanisaka lisusu yo ;
nakanisaka yo butu mobimba ;

7 pamba te yo ozali lisalisi na ngai ;
nazali koyemba na se ya elilingi
ya mapapu na yo.

8 Molimo na ngai ezali ya kokangama na yo ;
mpe loboko na yo ya mobali esimbi ngai makasi.

9 Baoyo bazali koluka bomoi na ngai bakobebisama ;
bakokita na se penza ya mabele ;

10 bakokufa na mopanga,
mpe bakokoma biloko ya koliya ya bambwa ya zamba.

11 Kasi mokonzi akosepela kati na Nzambe ;
moto nyonso oyo alapaka ndayi na kombo ya Nzambe,
bakosanzola ye ;
pamba te minoko ya bato ya lokuta ekokangama.